ಬೇಸರದ ದಾರಿಯಲಿ....!!!!

ಬೇಸರದ ದಾರಿಯಲಿ ದೂರಾಗದಿರೆ ಸಖಿ..
ದಾರಿ ಬೇಸರವಿಹುದು..ಪ್ರೀತಿಯಲ್ಲ..
ಸಂಜೆಯಲಿ ನೇಸರನ ಕಿರಣ ರಕ್ತದ ವರ್ಣ
ಶುಭ್ರವಾಗುವ ಕಾಲ ದೂರವಿಲ್ಲ..

ಬಹುದೂರವೀ ಹಾದಿ ಜೊತೆಯಾಗಿ ಹೊರಟಿಹೆವು..
ತ್ಯಜಿಸಬೇಕೆ ಇಂಥ ಮಧುರ ದಾರಿ..??
ನೋವು ನಲಿವಲೂ ನಿನ್ನ ಭುಜದಿ ಹೊರುವೆನು ಗೆಳತಿ
ಹೋಗಬೇಕೇ ನನ್ನ ಪ್ರೀತಿ ಮೀರಿ..??

ಜೀವ ದಾರಿಯ ಸತ್ಯ ಮಿಥ್ಯಗಳ ಸುಳಿವಲ್ಲೇ
ಪ್ರೀತಿ ಕೊರಗದೇ ಇರಲಿ ಭಾವ ಮರೆತು..
ನಿನ್ನ ಮಡಿಲಲೇ ನಾನು ಮಗುವಾಗಬೇಕಿನ್ನು
ನಿನ್ನ ಪ್ರೀತಿಯ ಲಾಲಿ ನನ್ನ ಬೆರೆತು..

              -ಶಿವಪ್ರಸಾದ ಭಟ್ಟ