ಪಯಣ

 

ಸಂಜೆಗತ್ತಲ ಬಾನ ಚುಕ್ಕಿಗೆ

ಮಿಂಚಿ ಮಿನುಗುವ ಕಾತರ

ಮುಗಿಲು ಮುತ್ತಿಹ ಕಾರು ಮೋಡಕೆ

ಶಶಿಯ ಮರೆಸುವ ಆತುರ

ಗೂಡು ಸೇರುವ ಖಗಮಹೋತ್ಸವ

ನಭಕೆ ಮಾಲೆಯ ತೋರಣ

ಗಗನ ಹೆಗಲಿಗೆ ನೊಗವ ನೀಡುವ

ಹಾದಿ ಕನಸಿನ ಚಾರಣ

ಮಸುಕು ಹಾದಿಯ ಹೆಜ್ಜೆಗುರುತಿಗೂ

ದಾರಿ ತಿಳಿಸುವ ಸಂಭ್ರಮ

ಪಾದ ಮೆತ್ತಿಹ ಧೂಳ ಸುತ್ತಲೂ

ಕನಸಿನುಸುಕಿನ ಸಂಗಮ

ಹೀಗೆ ಬಂದು ಹಾಗೆ ಹೋಗುವ

ಮಿಂಚು ತೋರೀತೇ ಹಾದಿಯ

ಗುಡುಗು ನಡುಗಿಸೋ ಕವಲು ಕತ್ತಲೆ

ಜೀವ ಜಾತ್ರೆಗೆ ನಿರ್ಭಯ

ಗಮ್ಯ ಸೇರುವ ರಮ್ಯ ಹಂಬಲ

ಸ್ಫುರಣ ದುಂದುಭಿ ಕಲ್ಪನೆ

ಭವ ದಿಗಂತದಿ ನವನವೋದಯ

ಪಯಣ ಮುಗಿಯದ ಭಾವನೆ..

                       -ಶಿವಪ್ರಸಾದ ಭಟ್ಟ